वडाखवर प्रतिनिधि २३ असार जाजरकोट । जाजरकोट स्थित डिभिजन वन कार्यालयका प्रमुख अमरप्रसाद साहमाथि आइतबार कार्यकक्षमै भएको कुटपिटको घटनाको जिम्मेवारी नेकपा विप्लव निकट युवा संगठन नेपालले लिएको छ। संगठनले एक विज्ञप्ति जारी गर्दै साहमाथि “जनकारबाही” गरिएको दाबी गरेको छ।

प्रेस विज्ञप्तिमा प्रमुख साहमाथि गरिएको कारबाहीका स्पष्ट कारणहरू सार्वजनिक गरिएको छ। संगठनका अनुसार प्रमुख साह वन दोहन, भ्रष्टाचार, मिलेमतो, जडिबुटी तस्करी, अवैध आर्थिक लाभ, र पार्टी कार्यकर्तालाई प्राथमिकता दिएर कर्मचारी नियुक्ति गर्ने जस्ता गम्भीर आरोपमा संलग्न छन्।

यी हुन् संगठनले लगाएका मुख्य आरोप:

1. जंगल दोहन र जडिबुटी तस्करी — शिवालय, नलगाड, र बारेकोट क्षेत्रका जंगलमा चरम वन विनाश भएको र जडिबुटी तस्करीमा संलग्न रही आर्थिक लेनदेन गरेको आरोप।

2. निर्माण सामग्रीको अवैध निकासी — बालुवा, गिट्टी, ढुङ्गा निकासीमा आर्थिक लेनदेन गर्दै गैरकानुनी निकासीलाई अनुमति दिएको भनिएको छ।

3. कर्मचारी नियुक्तिमा राजनीतिक पूर्वाग्रह — मनपरी ढंगले नियुक्ति गर्दै संगठनका कार्यकर्तालाई प्राथमिकता दिएको आरोप।

4. बजेट वितरणमा अनियमितता — वन उपभोक्ता समितिहरूको बजेट वितरणमा लाखौंको अनियमितता रहेको, परियोजना पारदर्शिताविहीन ढंगले सञ्चालन गरिएको आरोप।

5. शासकीय दुर्व्यवहार — कर्मचारीहरूसँग गैरपेशागत, अमानवीय व्यवहार गरिएको भन्ने आरोप।

6. करार कर्मचारीको तलब रोकिने — महिनौं काम गरे पनि तलब नदिइने लापरवाही देखिएको भन्दै आरोप लगाइएको छ।

‘जनकारबाही’को चेतावनी र समर्थन

युवा संगठन नेपालका संयोजक अजयद्वारा हस्ताक्षरित विज्ञप्तिमा भनिएको छ, “साहलाई पटक–पटक चेतावनी दिइए पनि उनले प्रशासनको आड लिएर उल्टै धम्की दिने काम गरेकाले बाध्य भएर जनकारबाही गरिएको हो।” विज्ञप्तिमा संगठनले “वैज्ञानिक समाजवादी व्यवस्था” स्थापनाका लागि संघर्ष जारी रहेको भन्दै भ्रष्ट, दलाल र निरंकुश प्रवृत्तिका विरुद्ध कारबाही गरिने स्पष्ट पारेको छ।

विज्ञप्तिमा घटनामा प्रत्यक्ष–अप्रत्यक्ष रूपमा समर्थन जनाउने सबै जनसमुदाय, सहकर्मी, नागरिक समाज र सहभागीलाई धन्यवाद दिँदै, “संगठनविरुद्ध झूठा मुद्दा लगाउने प्रयास भए गम्भीर परिणाम भोग्नुपर्ने” चेतावनीसमेत दिइएको छ।

प्रहरी अनुसन्धानको थालनी

घटनापछि जिल्ला प्रहरी कार्यालय जाजरकोटले डिभिजन वन कार्यालयको सीसीटीभी फुटेज संकलन गर्दै अनुसन्धान सुरु गरेको जनाएको छ। प्रहरी निरीक्षक एवं सूचना अधिकारी हरिराम डाँगीका अनुसार, “हामीले खोजीरहेका छौं, उहाँहरुले विज्ञप्ति निकालेपछि झनै सजिलो भयो।”

प्रहरीले घटना योजनाबद्ध रूपमा भएको हुन सक्ने शंका गर्दै संभावित संलग्न पक्षको खोजीलाई तीव्र पारेको जनाएको छ।

प्रमुख साहको प्रतिक्रिया

कुटपिटमा परेका प्रमुख अमरप्रसाद साहले आफूमाथि भएको आक्रमण “पूर्वनियोजित” भएको दाबी गर्दै उक्त घटनाले चरित्र हत्या गर्ने नियत बोकेको बताएका छन्। उनले जिल्ला प्रहरी कार्यालयमा निवेदन दिंदै कुटपिट र दुर्व्यवहारको निष्पक्ष छानबिन गर्न माग गरेका छन्।

बहसको घेरामा सरकारी सेवा र कर्मचारी सुरक्षा

घटनाले सरकारी कर्मचारीको सुरक्षामाथि गम्भीर प्रश्न उठाएको छ। यसले प्रशासनिक स्वच्छता, विधिको शासन र राज्यको हिंसामुक्त सेवामूलक संरचनामाथि पुनर्विचार गर्नुपर्ने बहस चर्किएको छ। राज्य संयन्त्र, कानुनी प्रक्रिया र गैरसरकारी समूहहरूको भूमिकाबारे प्रश्न उठिरहेका छन्।

सरकारी कार्यालयभित्रै भएको  कारबाहीको जिम्मा राजनीतिक समूहले लिनु नेपालमा राज्यसंस्थाको सुरक्षा, कानुनी शासन र कर्मचारी मनोबलप्रति गम्भीर चुनौतीको रूपमा हेरिएको छ।

अलिहे सम्म जिल्लाका अधिकार कर्मीहरु भने कार्यकक्षमा गएर हातपात गर्नु भन्दा अन्य कानूनी उपचारहरु प्र
शस्त हुदा हुदै , जन दवाब दिने ,ज्ञापन पत्र दिने , स्थानीय प्रशासनमा उजुरी गर्ने ,विरोध सभाहरु गर्ने जस्ता उपाए हुदा हुदै यस्तो गर्नु परिपक्क राजनैतिक संस्कर नभएको प्रतिक्रियाहरु दिइरहेका छन् ।