बालकुमार शर्मा
१३ फागुन २०८१, जाजरकोट।

खलंगास्थित बसपार्कमा गएराति करिब १२ बजे लागेको आगो आज बिहान नियन्त्रणमा आएको छ। बसपार्क क्षेत्रमा रहेको सौरभ एण्ड गौरब सप्लायर्समा आगलागी हुँदा पसल पूर्ण रूपमा जलेर नष्ट भएको छ।

पसलका सञ्चालक कर्णबहादुर वलीका अनुसार पसलभित्र रहेका मोबाइल तथा विभिन्न इलेक्ट्रोनिक्स सामग्री जलेर नष्ट भएका छन्। साथै, सँगै रहेको अर्को पसलका प्लास्टिक तथा हार्डवेयरका सामान, भाँडावर्तन र कपडा पसल समेत आगोले पूर्ण रूपमा क्षति पुर्‍याएको छ। दुवै पसल खरानीमा परिणत भएका छन्।

रातिको समयमा आगलागी भएकाले समयमै थाहा नपाउँदा क्षति ठूलो भएको वलीले बताए। उनका अनुसार करिब ८० लाख रुपैयाँभन्दा बढी मूल्यका सामग्री जलेर नष्ट भएका छन्। आगलागीबाट पसल रहेको घरसमेत क्षतिग्रस्त भएको छ भने आसपासका अन्य पसलमा पनि आंशिक क्षति पुगेको छ।

घटनालगत्तै प्रहरी, नेपाली सेना र सशस्त्र प्रहरीको टोली घटनास्थलमा पुगेको थियो। नजिकै सेनाको टोली रहेकाले तत्काल परिचालन हुँदा आगो नियन्त्रणमा लिन सहज भएको स्थानीयले बताएका छन्।

भेरी नगरपालिका उपप्रमुख सीता जैसीका अनुसार रातिको समयमा खानेपानी लाइन सञ्चालनमा नरहेको अवस्थामा वहाँले आफ्नै घरको छतमा रहेको हिलटेक टंकीबाट पानी उपलब्ध गराएर आगो नियन्त्रणमा सहयोग पुर्याउनु भएको थियो ।

खलंगा बजारमा दमकलको व्यवस्था नहुँदा पटक–पटक आगलागी हुँदा ठूलो धनजनको क्षति हुँदै आएको स्थानीयको गुनासो छ। घटना घटेपछि मात्र दमकलको आवश्यकता चर्चामा आउने गरेको भन्दै स्थानीय सरकारले स्थायी समाधान गर्नुपर्ने माग उठेको छ।

पसलको बीमा समेत नगरेको अवस्थामा आफू पूर्ण रूपमा आर्थिक संकटमा परेको बताउँदै सञ्चालक वलीले सहयोगका लागि सबैसँग अपिल गरेका छन्।

आजै  उद्योग वाणिज्य संघ जाजरकोटले एक विज्ञप्ती जारी गर्र्दे सहयोग गर्न सवैलाई अपिल गरेको छ ।